Paola Antonelli er einn virtasti sýningarstjóri heims á sviðið hönnunar og arkitektúrs. Hún hóf störf við MoMa, Nýlistasafnið í New York árið 1994 og starfar þar sem yfirsýningarstjóri arkitektúrs og hönnunar ásamt því að vera stofnandi og stjórnandi rannsókna og þróunar hjá safninu. Síðan 2020 hefur Paola unnið að verkefninu Design Emergency ásamt hönnunargagnrýnandanum Alice Rawsthorn. Verkefnið, sem er bæði bók og instagram-vettvangur (@design.emergency) er yfirstandandi rannsókn á hlutverki hönnunar og arkitektúrs í að móta betri framtíð fyrir öll. Paola hefur í verkum sínum rannsakað hönnun í öllum formum, allt frá arkitektúr yfir í tölvuleiki. Oftar en ekki beinir hún sjónum að hlutum og venjum sem við hugsum alla jafna ekki um. Í sýningum sínum, fyrirlestrum og skrifum veltir hún fyrir sér hvernig hönnun á í samtali og stefnumóti við aðrar greinar, allt frá tækni yfir í líffræði og alþýðumenningu, sem og lífið sjálft, þ.e. einstaklinga, samfélög, aðrar lífverur og plánetur. Markmið hennar er að auka skilning á hönnun þar til sem flest eru meðvituð um hversu jákvæð áhrif hún hefur haft á heiminn.

Paola lærði arkitektúr í Polytechnic í Mílanó og hefur unnið af hugsjón að hönnun. Hún var á lista Times magazine yfir 25 helsta hugsjónafólk heims í hönnun, hlaut alþjóðlegu verðlaun Design Mind Smithsonian Institution og var valin í US Art Directors Hall of Fame.

Ásamt því að hafa starfað sem sýningarstjóri hjá MoMa hefur Paola stýrt fjölda alþjóðlegra sýninga, haldið fyrirlestra um heim allan, m.a. hjá TED og á Heimsviðskiptaráðstefnunni í Davos (e.World Economic Forum) og skrifað fjöldan allan af greinum og bókum. Árið 2019 sýningarstýrði Paola XXII Triennale di Milano Broken Nature, tileinkaða endurnýjandi hönnun (e.regenerative design), sem snýst um virðingu í umgengni við náttúruna og árið 2020 sýningarstýrði hún Material Ecology í MoMA, sem fjallaði um verk arkitektsins Neri Oxman. Paola stendur reglulega fyrir þematengdum viðburðum á vegum rannsóknar- og þróunardeildar MoMa sem hafa það að markmiði að sýna samfélagslegt mikilvægi safna sem rannsóknarvettvangs. Í september 2022 opnaði hún sýninguna Never Alone í MoMa en sýningin fjallar um tölvuleiki og gagnvirka hönnun.

Breeze 2023

Sýningastaður

Þátttakendur