Áhugaverðar innsetningar sem dreifast víða um borgina og út á land. 11 leirlistamenn sýna snagana í rýmum bæði úti og inni, miðpunktur sýningarinnar verður í Rammagerðinni á Skólavörðustíg. Þar verða allar upplýsingar ásamt korti aðgengilegar ásamt lifandi leirvinnustofu í glugga verslunarinnar.
Leirlistafélga Íslands fagnar 40 ára afmæli í ár með metnaðarfullri dagskrá, sýningin Snagi • höngum saman • það er í góðu lagi að hanga saman, er framlag félagsins á HönnunarMars 2021. Sýningin samanstendur af áhugaverðum innsetningum sem settar eru upp í almenningsrýmum víða um borgina og þær teygja sig einnig út á land til Akureyrar, á Akranes, á Suðurland og á Suðurnesin þar sem félagsmenn búa og starfa. Rammagerðin á Skólavörðustíg verður miðpunktur sýningarinnar, Þar sem allar upplýsingar um sýnendur, sýningarstaði ásamt korti eru aðgengilegar gestum auk þess sem sett verður upp lifandi leirvinnustofa í glugga verslunarinnar þar sem fólki gefst kostru á að fylgjast með leirmunum verða til. Félagsmenn nálgast viðfangsefnið á fjölbreyttan hátt í sameiginlegu þema sem er spennandi fyrir listunnendur til að kynna sér leirlist á Íslandi í dag sem er á mörkum iðnaðar, lista, nytjalista og hönnunar. Áhugi almennings á leirlist og keramikhönnun hefur aukist undanfarin misseri sem og meðvitund fólks fyrir gildi góðs handverks og hönnunar.
Ellefu félagsmenn taka þátt í þessum viðburði þar sem hver þátttakandi hannar snaga sem svo hann kemur fyrir í opnum almenningsrými ýmist úti eða inni, þar sem vegfarendur geta fylgt leiðarkorti snaganna, staldrað við og hengt af sér.
Sýnendur eru: Bjarni Viðar Sigurðsson, Dagný Gylfadóttir, Guðný Hafsteinsdóttir, Halla Ásgeirsdóttir, Hólmfríður Vídalín Arnagrímsdóttir, Katrín Valgerður Karlsdóttir, Kolbrún Sigurðardóttir, Margrét Árnadóttir, Margrét Jónsdóttir, Ragna Ingimundar og Ragnheiður Ingunn Ágústsdóttir.